Sut rydyn ni’n gweithio

Mae Cyfraith Gymunedol Gogledd Cymru yn dîm bach o gyfreithwyr arbenigol, gweithwyr achos a staff eraill sy’n helpu pobl i gael mynediad at gyfiawnder a chynnal eu hawliau cyfreithiol.

Rydyn ni’n cynnig cymorth am ddim. Ni fyddwn byth yn codi tâl arnoch chi am gyngor cyfreithiol. Os bydd yn costio i ni eich helpu chi (ffi’r llys er enghraifft), byddwn ni’n rhoi gwybod i chi ac yn egluro pethau’n glir. Os bydd angen i chi fynd i apwyntiad ac nad ydych chi’n gallu fforddio costau teithio, efallai y byddwn ni’n gallu eich helpu chi.

Rydyn ni’n gwybod bod y problemau sy’n effeithio ar y pethau pwysicaf mewn bywyd, fel eich cartref a’ch teulu, yn gallu peri pryder, yn gymhleth, ac yn gallu achosi problemau eraill neu eu gwneud nhw’n waeth. Gall deall eich hawliau a gofyn am help fod yn frawychus.

Yng Nghyfraith Gymunedol y Gogledd, rydyn ni am ei gwneud hi mor hawdd â phosibl i chi gael yr help sydd ei angen arnoch chi.

Mae ein tîm yn gyfeillgar ac yn groesawgar. Byddwn ni’n rhoi’r amser sydd ei angen arnoch chi i egluro eich sefyllfa a dweud sut rydych chi eisiau i ni eich helpu. Byddwn ni’n gwneud ein gorau i weithio ar gyflymder sy’n addas i chi a byddwn ni’n egluro eich opsiynau a beth allai’r canlyniadau fod er mwyn i chi allu gwneud penderfyniad gwybodus sydd orau i chi. Byddwn ni’n glir ynghylch yr hyn y gallwch chi ei ddisgwyl nesaf, pryd, a beth fydd yn digwydd. Byddwn ni’n onest ynghylch pryd a pham na allwn ni eich helpu, a byddwn ni’n gwneud ein gorau i’ch helpu chi i ddod o hyd i rywun sy’n gallu eich helpu chi.

Beth fydd yn digwydd pan fyddwch chi’n cysylltu â ni

Pan fyddwn ni’n cysylltu â chi, neu os byddwch chi’n ffonio yn ystod ein horiau agor, bydd aelod o’n tîm yn gofyn am rywfaint o wybodaeth fel eich enw, eich dyddiad geni, ble rydych chi’n byw, sut ydych chi eisiau i ni gysylltu â chi yn y dyfodol, a’r math o broblem rydych chi eisiau help ar ei chyfer.

I gael rhagor o wybodaeth am eich sefyllfa a sut y gallwn ni helpu, efallai y byddwn ni’n gofyn i chi anfon copïau o ddogfennau fel llythyrau rydych chi wedi’u cael. Mae gwybodaeth am sut rydyn ni’n storio eich gwybodaeth ar gael yma.

Byddwn ni’n edrych yn ofalus ar yr hyn rydych chi wedi’i ddweud wrthym ni ac unrhyw wybodaeth arall rydych chi wedi’i hanfon, a byddwn ni’n rhoi gwybod i chi cyn gynted â phosibl a allwn ni eich helpu.

Os ydyn ni’n gallu eich helpu chi, bydd cyfreithiwr yn cysylltu â chi i drefnu apwyntiad neu i drafod eich achos ymhellach. Byddwch chi’n cael llythyr yn dweud wrthych chi beth y gallwch chi ei ddisgwyl gennym ni a beth i’w wneud os bydd rhywbeth yn mynd o’i le.

Os nad ni yw’r bobl orau i’ch helpu chi, neu os oes angen help ychwanegol arnoch chi na allwn ni ei gynnig, byddwn ni’n gwneud ein gorau i’ch rhoi chi mewn cysylltiad â rhywun sy’n gallu gwneud hynny.

Rydyn ni’n gweithio gyda llawer o sefydliadau lleol sy’n cynnig help gyda llawer o wahanol bethau, fel:

Gwneud yn siŵr eich bod chi’n cael yr holl fudd-daliadau lles mae gennych hawl iddyn nhw
Helpu gyda bwyd, dillad a dodrefn i chi a'ch teulu
Helpu gyda’ch iechyd meddyliol neu gorfforol
Pryderon am eich diogelwch

Gallwn ni hefyd eich rhoi chi mewn cysylltiad â chyfreithwyr eraill sy’n arbenigo mewn gwahanol fathau o gyfraith, fel mewnfudo, cyflogaeth a gwahaniaethu.

Os ydych chi eisiau i ni wneud hynny, gallwn ni roi gwybod i chi pwy all eich helpu chi a sut mae cysylltu â nhw. Gallwn ni hefyd eich cyflwyno chi iddyn nhw, a threfnu i chi siarad â nhw.

Os oes penderfyniadau i’w gwneud ar unrhyw adeg yn ystod eich achos ynghylch pa opsiynau i’w cymryd, byddwn ni’n rhoi gwybod i chi am yr opsiynau hynny, unrhyw risgiau a’r canlyniadau posibl. Ein rôl ni yw rhoi cyngor i chi. Ni fyddwn byth yn gwneud penderfyniadau ar eich rhan.

Sut gallaf gael cymorth?

Rhagor o wybodaeth am ble rydyn ni’n gweithio a sut gallwch chi gysylltu â ni.

Lle rydyn ni’n gweithio

Cysylltwch â ni